培育鑽石

佢係乜

同天然鑽石一樣嘅嘢：純碳結晶，一樣嘅硬度、一樣嘅火彩、一樣嘅物理化學性質。分別係佢喺實驗室入面用 HPHT（高溫高壓）或者 CVD（化學氣相沉積）方法生長，用幾個星期行完地球幾十億年嘅路。

「咁即係假嘅？」

唔係。呢個係我成日要答嘅問題：培育鑽石係真鑽石。國際鑑定機構（GIA、IGI）都會出培育鑽石證書——會寫明 Laboratory-Grown。假鑽石另有其人（例如玻璃、鋯石），嗰啲先係「扮嘢」。

我做鑑證嗰陣點睇佢

肉眼、十倍放大鏡分唔到天然定培育——連行內人都分唔到，要靠專業儀器同證書。所以買培育鑽最緊要嘅係：證書寫得清清楚楚，價錢畀得明明白白。

市面常見伏位

• 當天然賣：最大鑊嘅一種。冇證書或者證書含糊嘅「靚價天然鑽」，要起戒心。
• 培育當保值：培育鑽石嘅價一直落緊，買嚟戴係好選擇，買嚟「投資」就唔係嗰回事。
• 價格混水：同一粒規格，唔同渠道個價可以差好遠——培育市場個價仲未定型，更加要格。

買之前記住一句

培育鑽石買嘅係「戴」，唔係「儲」。諗清楚你要嘅係邊樣，佢就係好選擇。